काठमाडौँ, ९ कार्तिक
नेपालको दोस्रो मुख्य चाड दीपावली, नेपाल संवत् ११४० तथा छठपर्वको शुभअवसरमा आयोजित शुभकामना आदान–प्रदान कार्यक्रमका वक्ताले नेपालका सबै धर्म, संस्कृति तथा संस्कार नेपालको गौरव मात्र नभई विश्वमा नेपालको पहिचान प्रदर्शित गरिरहेको बताएका छन् ।
काठमाडौँको गोँगबुस्थित नेपाल गृहष्ठ धर्म सेवा सदनले आयोजना गरेको सो कार्यक्रममा त्यस क्षेत्रका विभिन्न जातजातिको उपस्थिति थियो ।
सो अवसरमा पूर्वमेयर एवं राप्रपाका नेता राजाराम श्रेष्ठले प्राचीनकालदेखि नै सबै धर्मावलम्बी मिलीजुली बसेको नेपालमा हाल केही समययता हिन्दू धर्ममाथि प्रहार हुन थालेकोमा चिन्ता व्यक्त गर्नुभयो ।
उहाँले दीपावली, नेपाल संवत् तथा छठपर्वजस्ता नेपालको मौलिक पर्व तथा चाडले नेपालको गौरव बढाइरहेको उल्लेख गर्नुभयो ।
नेपाल गृहष्ठ धर्म सेवा सदनका अध्यक्ष एवं आचार्य गुरु तुलसीराम पोखरेलले सबै मानवजातिलाई सुख, शान्ति तथा सद्भावका साथ जिउन सिकाउने बताउँदै मानिस–मानिसबीच सदभावपूर्वक बाँच्न जाने मात्र समाजमा शान्ति कायम हुने बताउनुभयो ।
